Leitzako Udalak onarpena eman die 2023rako aurrekontuei, hasiera batean. Hasitako  hainbat proiektu amaituko dira eta datozen hilabeteetan ere inbertsioak eta  hobekuntzak egingo dira udalerrian. 

Leitzako Udalak hasierako onarpena eman dio 2023rako 2.960.732 euroko aurrekontuari.  Hala ere, aurreikuspenen arabera, inbertsio berri bat egingo da laster aurrekontu aldaketa  bidez, ur-bilketa eta goi-hornidurako hoditeria berritzeko proiektu garrantzitsua  sartuko baita. Proiektu hori amaitzen ari da une honetan, eta 600.000 eurotik gorakoa  izango denez, berriki onartutako aurrekontuei gehituko zaie kopuru hori.  

Izan ere, Udalak datorren urtean egingo duen inbertsio nagusia altako ur-hornidurarekin lotuta dago. Ondoren, hartunea eta eroanbidea berritu ondoren, udalerriko edateko uraren  hornidura-estazioa hobetzeko jarduketak egitea aurreikusten da. Jarduketa horiek guztiak  Nafarroako Gobernuaren Hiri Erabilerako Uraren Ziklo Integralaren 2019-2030 Plan  Zuzentzailearen parte dira, eta % 80ko dirulaguntza dute.  

Hala, Gorriztaran auzoko Gazpillo iturburuaren eta EUTEaren artean ur-bilketa eta goi hornidurako hoditeria berritzeko proiektua amaitzen ari da, eta urteko lehen hiruhilekoan  aterako da lizitaziora. EUTEko jarduketei buruzko proiektua, batez ere erabat estaltzean  oinarritua, jarraian egingo da.  

Horrela, horniduraren eraginkortasuna hobetuko da ur-ihesak saihestuko baititu, eta edateko  kalitatezko ur nahikoa epe luzerako ziurtatuko da udalerri osoarentzat. Oso gai garrantzitsua  ziurgabetasunez bizi ditugun klima-aldaketa garaietan.  

Baina ez da hori 2023rako aurreikusi den proiektu bakarra, legegintzaldi honetan zehar  abiatu diren hainbat proiektu amaitu eta ixtea baita asmoa:  

• • MIMUKAI: Lehen seihilekoan irekiko ditu ateak MIMUKAI zentroak. Udalak 700 metro  koadroko bulego batzuk erosi ondoren, eta Nafarroako Gobernuarekin sinatutako hitzarmen  bati esker finantzatutako egokitzapen-lanak gauzatu ondoren, MIMUKAI proiektuaren lehen  fasea martxan jarriko da, hau da, hainbat funtziotarako espazioak izango dituzten bulegoak. Bulego horiek honako hauetan banatuko dira: enpresen habi bat, ekintzaileentzako eta  enpresa sortu berrientzako bulego pribatuekin; coworking gune bat; prestakuntza-gela bat;  hainbat bilera eta sormen-gela; Cederna Garalurren garapen agenteen bulegoak; eta  garapen sozioekonomikoarekin zerikusia duten eskualdeko elkarteentzako bulegoak.  
  • Inguruarte: Udalak hainbat urte eman ditu herritarren parte-hartzearekin planteamenduak  garatzen, proiektu jakin bat diseinatzen, dagozkion baimenak izapidetzen eta dirulaguntzak  kudeatzen. Ondorioz, aurten egikarituko da Inguruartea proiektua, gaur egun egoera  txarrean dagoen erreka ondoko partzela bat berreskuratu eta, kiroleko, jolaseko eta  aisialdiko hainbat elementurekin egokitutako aisialdirako leku bihurtuz. Proiektuak 160.000 euroko aurrekontua du, eta hura finantzatzeko Landa Garapeneko Programaren 50.000  euroko dirulaguntza du, deialdi horren bidez lor daitekeen gehiena.
  • Energia Berriztagarrien Komunitatea: Udala eta Goiener Taldea proiektuaren  bultzatzaile direla, laster sortuko da Leitzeko EBK kooperatiba. Energia berriztagarrien  komunitate horretan, udalerriko bazkide kontsumitzaileak, partikularrak eta enpresak, izango  dira protagonista, eta erabakiak bazkide guztien arteko batzarretan hartuko dira. EBK horrek  autokontsumo partekatuko instalazioak bultzatuko ditu, energia-gaiei buruzko informazioa  emango du, energiaren kontsumoa murrizteari buruzko sentsibilizazioa landuko du eta,  azken batean, urrats bat izango da burujabetza energetikorako bidean.  
  • Erdi Aroari buruzko azterlana: Iñaki Sagredo historialariak hainbat urte daramatza  Udalaren enkarguz azterketa bat egiten Nafarroako erresuma zaharrak herrian zituen Erdi  Aroko defentsa-dorreei buruz. Ikerketa sakon hori, gai askoren inguruan argigarri izaten ari  da. Aurten bertan ezagutaraziko da eta publiko orokorrari hainbat formatutan helaraziko  zaio.  
  • Kultura eta aisialdiari bultzada: Leitzako Herri Aretoaren kultur programazioak bere  bidea egiten jarraitzen du hainbat berrikuntzekin, hala nola, kultura-bonuekin edo hainbat  erakunderekin egindako lankidetzekin. Kultura eskaintza zabala eta askotarikoa eskaintzen  jarraitzea da helburua, era berean edonorentzat eskuragarriago egingo delarik, bonu horiek  direla bide.

• Bestalde, herriko jaien atala 100.000 eurora igo da eta, lehen aldiz, partida propio bat  prestatu da jaietako sexu-erasoen aurkako protokolorako, 10.000 euro horretara bideratuz.

• Bideak hobetzea: Leitzelarrean baso-bideak hobetzen jarraitzea eta Gorriztaran auzotik  Sorogaineraino doan pista konpontzez bukatzea aurreikusten da. Gainera, ibilgailuen  trafikorako sarbidea arautuko da hainbat mendi eremutan, garai jakin batzuetan mugatzeko  eta zenbait unetan, ibilgailuen gehiegizko joan-etorria saihesteko.  
• Gizarte-larrialdietarako etxebizitza: Aleman familiak duela hilabete batzuk higiezin bat  dohaintzan eman zion Leitzako Udalari, baldin eta etxebizitza hori gizarte-larrialdietarako  erabiltzen bazen. Hala, premia larriko kasuetarako behin-behineko etxebizitza izanen da,  hala nola errefuxiatuentzat, indarkeria matxistaren biktima diren emakumeentzat,  etxegabetze kasuetarako, ohiko bizilekuan sutea pairatu dutenentzat eta gisako  kasuetarako, baita bestelako gizarte zerbitzuen erabilerarako ere. Orain, Udala izapidetzen  ari da higiezin hori Gizarte Zerbitzuen Mankomunitateari lagatzeko, hark gaitu, arautu eta  egoki kudea dezan. Beraz, Leitzak laster izango du etxebizitza bat premia larrian dauden  pertsona eta familientzako behin-behineko bizitoki gisa balioko duena, orain arte izan ez den  baliabidea.  

Guztira, 2023rako aurreikusitako inbertsioak milioi bat eurotik gorakoak izango dira,  eta horietatik gehienak dirulaguntzekin finantzatuko dira, laster aurrekontuan egingo diren  aldaketak kontuan hartuta.